កក្រើកទៀតហើយកាន់តែពិសេសកីឡាករជួរមុខកម្ពុជាទាំង៨រូបវាយ Tournament យកឡាន Pick Up ខ្លាញ់គោមួយគ្រឿង

 គុណខ្មែរ

កក្រើកទៀតហើយគុនខ្មែរឈុតនេះក្នុងប្រភេទទម្ងន់ ៦០គីឡូក្រាមប្រកួតដណ្តើមឡាន Pick Up ខ្លាញ់គោមួយគ្រឿងទៀតក្នុងនោះមានវត្តមានកីឡាករជួរមុខកម្ពុជាទាំងអស់គឺ ៨រូបដែលនឹងធ្វើការប្រកួតប្រជែងគ្នាមានដូចជា៖ សុខ ធី, ពុធ្ធ សំបូរ, មាស ណាឃីម, សាន់ គុនខ្មែរ, ធន់ វណ្ណា, ឡុង ជិន, ផន លីហួរ និង ហុង សុវណ្ណចាន់សុធី ។ ការប្រកួតដណ្តើមឡាននេះគឺមានរូបមន្តកីឡាករទាំងំ៨រូបនិងចែកចេញជាពីរពូល។ ខណៈពូលA មាន ៤រូបធ្វើការប្រកួតជម្រុះម៉ារ៉ាតុនយក ១រូបគត់ដែលឈ្នះក្នុងពូល A ទៅប្រកួតវគ្គផ្តាច់ព្រ័ត្រជាមួយពូលB ដែលមានកីឡាករ ៤រូបធ្វើការប្រកួតជម្រុះម៉ារ៉ាតុនយក ១រូបគត់ដូចគ្នា ដែលនឹងជួបគ្នាដើម្បីដណ្តើមយកឡានតែម្តង។ ពោលគឺដើម្បីក្លាយជាម្ចាស់ឡានខ្លាញ់គោថ្មីស្រឡាងបានគឺកីឡាករដែលជាម្ចាស់ជើងឯកត្រូវឆ្លងកាត់បីប្រកួត ដោយប្រកួតជម្រុះក្នុងពូល ២ដង និងឡើងទៅវគ្គផ្តាច់ព្រ័ត្រមួយដងទៀត។

ការប្រកួតវគ្គជម្រុះក្នុងពូលនេះធ្វើឡើងនៅក្នុងទឹកដីភាគពាយ័ព្យនាខេត្តបាត់ដំបង នៅថ្ងៃទី៨ ខែកញ្ញា ឆ្នាំ២០២៤ គឺជម្រុះយកកីឡាករ ២នាក់តែម្តងដើម្បីឡើងទៅដណ្តើមឡាន។ ចំណែកវគ្គកក្រើករំជើបរំជួលដើម្បីរកឃើញថានរណាជាម្ចាស់ឡានខ្លាញ់គោគឺធ្វើឡើងនៅរាជធានីភ្នំពេញ ទីក្រុងកោះពេជ្រ នៅថ្ងៃទី២៩ ខែកញ្ញា ឆ្នាំ២០២៤។ ជាមួយគ្នានេះដែរសមាសភាពកីឡាករគុនខ្មែរទាំង ៨រូបបានត្រៀមកម្លាំងកាយ កម្លាំងចិត្តរួចជាស្រេចក្នុងការប្រកួតប្រជែងលក្ខណៈ Tournament ឱ្យអស់ពីសមត្ថភាពព្រោះនេះជាឱកាសកម្រដែលមិនងាយនឹងកើតមានឡើង។ សូមរង់ចាំតាមដានទស្សនា គាំទ្រដល់កីឡាករគុនខ្មែរយើងទាំងអស់គ្នា ព្រមទាំងលើកទឹកចិត្តដល់ពួកគាត់ផងដែរ៕