បាល់ទាត់/ English
Cristiano Ronaldo បច្ចុប្បន្នមានវ័យជ្រេទៅហើយល្បឿន កម្លាំង បច្ចេកទេស សព្វបែបយ៉ាងបានធ្លាក់មិនដូចកាលពីក្មេងពេញកម្លាំងនោះទេ។ ចាំបានថាគេគឺជាអ្នកស៊ុតបញ្ចូលទីបានច្រើនជាងគេនៅលីកកំពូលអារ៉ាប់ប៊ីសាអូឌីត Saudi Pro League កាលពីរដូវកាលមុនជាមួយនឹងគ្រាប់បាល់ចំនួន ៣៥គ្រាប់ ហើយត្រូវបានគេកំណត់ថាអាចនឹងបង្កើតចំនួនគ្រាប់បាល់ស្រដៀងគ្នានៅឆ្នាំនេះបន្តទៀត។ Louis Saha បានប្រាប់ TVSporten ថា៖ "Cristiano Ronaldo មានចំណង់ចំណូលចិត្ត និងការប្តេជ្ញាចិត្តក្នុងការត្រលប់ទៅកាន់ក្លិបបិសាចក្រហម Manchester United នៅថ្ងៃណាមួយ ប្រហែលជាក្នុងនាមជាគ្រូបង្វឹក ឬជាអ្នកគ្រប់គ្រងក្លិបតែម្តង"។
មួយរយៈចុងក្រោយនេះនៅទឹកដីអាស៊ីប្រទេសអ្នកមានអារ៉ាប់ប៊ីសាអូឌីត Cristiano Ronaldo កំពុងតែប្រកបអាជីពបាល់ទាត់នៅក្លិប Al Nassr ហាក់មិនសូវទទួលបានលទ្ធផលវិជ្ជមានប៉ុន្មាននោះទេនាដើមរដូវកាលថ្មីនេះ។ ខណៈក្លិប Al Nassr បានបន្តចាញ់ក្លិបគូប្រជែង Al Hilal នៅវគ្គផ្តាច់ព្រ័ត្រពានរង្វាន់ Super Cup ថ្មីៗនេះផងដែរ។ ទន្ទឹមនឹងការបរាជ័យបន្តបន្ទាប់ជាមួយក្លិប Al Hilal កីឡាករចាស់វស្សាវ័យ ៣៩ឆ្នាំ Cristiano Ronaldo បានទទួលនូវអារម្មណ៍មិនល្អជាមួយអ្នកគាំទ្ររបស់ Al Hilal ដែលបានច្រែកហៅឈ្មោះ Messi នៅពីមុខខ្លួនហាក់បីដូចជាការឌឺដង។ ទង្វើទាំងអស់នេះអាចធ្វើឱ្យ Cristiano Ronaldo មិនសប្បាយចិត្តនឹងអាចចាកចេញពីទឹកដីអាស៊ីមួយនេះក៏ថាបាន ហើយមិនខុសពីអ្វីដែល Louis Saha ដែលជាអតីតខ្សែប្រយុទ្ធបិសាចក្រហមនិយាយនោះទេថាថ្ងៃណាមួយ Ronaldo នឹងត្រលប់ទៅកាន់ Manchester United វិញ៕
